Apoio para O Labirinto Ario

O Pazo de Tor acolleu a xornada de apoio á curtametraxe O Labirinto Ario de face aos premios Mestre Mateo. Esta produción, dirixida por Alfredo Pardo e producida por Chantada Films contou co apoio da área de Cultura da Deputación e foi rodada no lugar no que se celebrou o acto de apoio. O propio director do curto e a xerente da rede museística provincial, Encarna Lago , foron os encargados de oficiar como anfitrións.

Nada mellor para apoiar ao considerado como sétimo arte que a poesía. Helena Villar Janeiro, Cristina Corral Soilán -acompañada polo músico Xavier Prado-Xesús Rábade Paredes e o escultor e contacontos Paco Pestana recitaron poemas en distintas habitacións do pazo, nalgúns casos acompañados por música. A proxección da curtametraxe foi a guinda dunha gran xornada que concluíu cunha degustación de produtos galegos e de viños de Ribeira Sacra. O programa continua hoxe con catro novas visitas guiadas ao pazo nas que tamén poderá visionarse o filme e que levarán a cabo ás doce e unha do mediodia e ás cinco e seis da tarde.
Autor:
X. R. Penoucos xoseramon.penoucos@lavoz.es
Data de publicación:
24/1/2010

ESTREA DE SEPARACION

BSF INdy Productions comunica o remate da produción da curtametraxe ´Separación´, dirixida por Felipe Neira
26-01-2009

O venres 30 de xaneiro terá lugar a estrea da curtametraxe SEPARACIÓN dirixida por Felipe Neira. O acto será presentado polo ClubE Cultural Valle Inclán no salón de actos da E.U. de Maxisterio de Lugo, a partir das 20h00, con entrada libre. Nel, os produtores do proxecto (Felipe Neira, Boris Hinojo e Juan Araujo) así como os seus protagonistas, presentarán dende diferentes puntos de vista a rodaxe e produción da curtametraxe.

´Separación´ foi rodada en múltiples localidades da cidade de Lugo, así como na finca de Marcelle Natureza e nas instalacións do matadoiro de Frilea en Castro de Rei, sendo os seus protagonistas principais os lucenses Roi Correa e Mauro García, que traballaron sobre o guión de Boris Hinojo. A dirección de fotografía foi levada a cabo por Juan Araujo. Ademais hai que destacar o esforzo da produción non subvencionada, ao empregar un especialista profesional en efectos especiais, Ricardo Spencer, con ampla experiencia e que traballou en diversas longametraxes como Los Lunes al Sol.

Mención aparte, a banda sonora orixinal foi creada polo compositor Sergio Pena, membro da Academia Galega do Audiovisual, con ampla experiencia musical como a súa colaboración nas longametraxes de animación "O bosque animado" e "Soño dunha noite de San Xoan". O tema principal foi creado especialmente para a curtametraxe pola nova banda ourensana Kaleya.

A obra integramente galega pretende mostrar diferentes percepcións do medio natural, poñendo en evidencia a desnaturalización do ser humano influenciado polo ambiente que o rodea.

A curtametraxe contou con múltiples colaboracións, "Fundación TIC", "Lugopress, "Ophiusa Productora de Vídeo - Editorial", "Marcelle Natureza", "Club Clavicembalo de Lugo", "FRILEA", "Spencer SFX", "Columbia Store Lugo", xunto a un grande número de persoas que fixeron posible este proxecto.

E.U. de Maxisterio de Lugo
Avda. de Ramón Ferreiro, s/n.
27071 Lugo
Teléfono: 982285865
Fax: 982285864
Correo electrónico: exbdeca@lugo.usc.es
Web: http://www.usc.es/maxisterio

SEPARACION BSO

A banda sonora de Separación xa está rematada e sincronizada na edición.
O xoves 18 de decembro tivo lugar unha pre-estrea na fundación TIC na que acadóu unha boa impresión por parte do publico asistente.
Creo sinceramente que este traballo dará que falar a mais dun critico, pola súa frescura e calidade a pesar da precariedade de medios.